കായികം യുവജനക്ഷേമം
പുരാതനകാലം മുതൽക്കേ കായിക വിനോദങ്ങളെ പ്രോത്സാഹിപ്പിച്ച നാടാണ് കേരളം. കുട്ടിയും കോലും ഗോട്ടിയും തലപ്പന്തും കിളിത്തട്ടും വള്ളംകളിയും എല്ലാം കേരളത്തിന്റെ സ്വകാര്യമായ കളിയഹങ്കാരങ്ങളായി നമുക്കുണ്ടായിരുന്നു, തിരുവാതിരകളിയും മാർഗംകളിയും പരിചമുട്ടുകളിയും വേലകളിയും കളരിപ്പയറ്റുമടക്കമുള്ളവ കലകൾക്കപ്പുറം കായിക ഇനമായും പരിഗണിച്ചിരുന്നു. ബ്രിട്ടീഷുകാരുടെ അധിനിവേശത്തോടെയെത്തിയ പുത്തൻകളികൾ നാടൻകളികളിൽ പലതിനേയും അപ്രത്യക്ഷമാക്കി. കേരളത്തിന്റെ തനത് കായിക പ്രയോഗങ്ങളിൽ ഒരു പരിധി വരെയെങ്കിലും പിടിച്ചു നിൽക്കുന്നത് കളരിപ്പയറ്റാണ്. ഇന്ന് കേരളത്തിൽ പ്രചാരത്തിലുള്ള പല കളികൾക്കും കായിക വിനോദത്തിനും പല ചരിത്രങ്ങൾ പറയുവാൻ ഉണ്ടാകും. ഗ്രാമങ്ങളിൽ, വിനോദത്തിനും നേരമ്പോക്കിനും ആരംഭിച്ച ഇവ പിന്നീട് മത്സങ്ങൾ ആയി മാറി. പതുക്കെ അവ കേരളത്തിന്റെ കായിക സംസ്‌കാരത്തിൽ തങ്ങളുടേതായ സ്ഥാനം പിടിച്ചു.
1835ൽ വില്യം ബെന്റിക്കിന്റെ വിദ്യാഭ്യാസ പരിഷ്കരണങ്ങളുടെ ഭാഗമായി ഫിസിക്കൽ എഡ്യുക്കേഷനും പാഠ്യവിഷയമായി. കേരളത്തിലെ മിഷനറി സ്കൂളുകളിൽ ഫിസിക്കൽ എഡ്യുക്കേഷന് അന്നുമുതൽ പ്രാധാന്യം നൽകി. 1949ൽ രാഘവൻ നായരുടെ നേതൃത്വത്തിൽ കേരളത്തിലെ ഒളിമ്പിക് അസോസിയേഷൻ ആരംഭിച്ചു. ഇതോടൊപ്പം ട്രാവൻകൂർ അത്‌ലറ്റിക് അസോസിയേഷൻ, ട്രാവൻകൂർ ബാസ്കറ്റ്‌ബോൾ അസോസിയേഷൻ, ട്രാവൻകൂർ വോളിബോൾ അസോസിയേഷൻ തുടങ്ങിയ സംഘടനകൾ കേരള ഒളിമ്പിക് അസോസിയേഷനു കീഴിൽ നിലവിൽ വന്നു.ഫുട്‌ബോളിലും വോളിബോളിലും അത്‌ലറ്റിക്‌സിലും ബാസ്കറ്റ്‌ബോളിലുമൊക്കെ ഏറ്റവും മികച്ച താരങ്ങളെ സംഭാവന ചെയ്യാൻ കേരളത്തിനായി.
ഐക്യകേരളം പിറക്കുന്നതിനു രണ്ടു വർഷം മുമ്പേ കേണൽ ഗോദവർമരാജ കേരള സ്‌പോർട്‌സ് കൗൺസിലിനു രൂപം നൽകി. ട്രാവൻകൂർ – കൊച്ചിൻ സ്‌പോർട്‌സ് കൗൺസിലാണ് പിന്നീട് കേരള സ്‌പോർട്‌സ് കൗൺസിലായി മാറിയത്. 1974ൽ കൗൺസിൽ പുനഃസംഘടിപ്പിച്ചു. ഫുട്‌ബോളിനെ നെഞ്ചേറ്റുന്ന ഒരു സംസ്ഥാനമെന്ന നിലയ്ക്ക് കേരളത്തിന്റെ കായിക ചരിത്രത്തിൽ കേരള ഫുട്‌ബോൾ അസോസിയേഷന്റെ പങ്ക് വളരെ വലുതാണ്. ഇന്ത്യക്കു വേണ്ടി ഒരു കാലത്തു കളിക്കുന്ന ഭൂരിഭാഗം താരങ്ങളും കേരളത്തിൽനിന്നുള്ളവരായിരുന്നു.
രാജ്യം സംഭാവന നൽകിയ മികച്ച കായികതാരങ്ങളുടെ പട്ടിക പരിശോധിച്ചാൽ അതിൽ ഏറിയ പങ്കും കേരളത്തിൽനിന്നാണ്. ശ്രീശാന്തും സഞ്ജു സാംസണും ടിനു യോഹന്നാനും ക്രിക്കറ്റിൽ കേരളത്തിന്റെ സംഭാവനകളാണ്. ഫുട്‌ബോളിൽ ഐ.എം. വിജയനും വി.പി. സത്യനും കുരികേശ് മാത്യുവും, ഹോക്കിയിൽ മാനുവൽ ഫെഡറിക്കും പി.ആർ. ശ്രീജേഷും, വോളിബോളിൽ ജിമ്മി ജോർജും ടോം ജോസഫും ഉദയകുമാറും സിറിൽ വള്ളൂരും കപിൽദേവും നാമക്കുഴി സഹോദരിമാരും ഏലമ്മയും ബാഡ്മിന്റണിൽ വലിയവീട്ടിൽ ഡിജുവും വിമൽകുമാറും, ബാസ്കറ്റ്‌ബോളിൽ ഗീതു അന്ന ജോസ്, ജയശങ്കർമേനോൻ, സി.വി. സണ്ണി, അൻമിൻ ജെ. ആന്റണി എന്നിവരും കേരളത്തിന്റെ മികച്ച സംഭാവനകളാണ്.
അത്‌ലറ്റിക്‌സിലാണ് നാം ഏറ്റവും കൂടുതൽ രാജ്യാന്തരതാരങ്ങളെ സംഭാവന നൽകിയത്. 1924 ഒളിമ്പിക്‌സിൽ പങ്കെടുത്ത സി.കെ. ലക്ഷ്മണിൽ തുടങ്ങുന്നു നമ്മുടെ അത്‌ലറ്റുകളുടെ ചരിത്രം. പി.ടി. ഉഷയും അഞ്ജു ബോബി ജോർജും രാജ്യം കണ്ട എക്കാലത്തെയും മികച്ച അത്‌ലറ്റുകളാണ് . ഐവാൻ ജേക്കബും സുരേഷ്ബാബുവും മേഴ്‌സിക്കുട്ടനും ഷൈനി വിത്സണും രഞ്ജിത് മഹേശ്വരിയും പ്രീജ ശ്രീധരനും കെ.എം. ബീനാമോളും എം.ഡി. വത്സമ്മയും ടിന്റു ലൂക്കയുമൊക്കെ രാജ്യത്തിനായി മെഡലുകൾ വാരി. ദേശീയ തലത്തിൽ നടക്കുന്ന അത്‌ലറ്റിക് ടൂർണമെന്റുകളിൽ കേരളം നിരന്തരം ഓവറോൾ ചാമ്പ്യന്മാരായി.
അവസാനമായി അപ്ഡേറ്റ് ചെയ്തത് : 18-07-2022
ലേഖനം നമ്പർ: 664