മാവിലന്‍
കാസര്‍കോട്, കണ്ണൂര്‍ ജില്ലകളില്‍ മാത്രമാണ് മാവിലന്‍ സമുദായം ഉള്ളത്. മാവിലന്‍ എന്ന പദത്തിന്റെ ഉല്‍പ്പത്തിയെക്കുറിച്ച് നിരവധി അഭിപ്രായങ്ങളുണ്ട്. ചിലര്‍ പറയുന്നതനുസരിച്ച് ഇവര്‍ ശരീരം മറയ്ക്കാന്‍ മാവിന്റെ ഇലകള്‍ ഉപയോഗിച്ചിരുന്നു. 'മാവില' ഇവര്‍ ഉപയോഗിക്കുന്ന ഔഷധ സസ്യമാണെന്ന് വേറെ ചിലര്‍ പറയുന്നു. മറ്റു ചിലര്‍ പറയുന്നത് 'മലയിലെ വേലന്‍' (കാട്ടുവേലന്‍) എന്നത് മാവിലന്‍ എന്നറിയപ്പെടാന്‍ തുടങ്ങിയെന്നാണ്. തുളു സംസാരിക്കുന്ന ഇവര്‍ക്ക് മലയാളത്തില്‍ നല്ല പരിജ്ഞാനമുണ്ട്. തൊഴിലാളികളെ നിയന്ത്രിക്കാനും തര്‍ക്കങ്ങള്‍ പരിഹരിക്കാനുമായി ഭൂവുടമ നിയമിക്കുന്ന സമൂഹത്തിന്റെ തലവനെ 'കിരണ്‍' എന്ന് വിളിക്കുന്നു. ഇപ്പോള്‍ മതപരമായ ആചാരങ്ങളും അനുഷ്ഠാനങ്ങളും നിയന്ത്രിക്കുകയും തലവനായി പ്രവര്‍ത്തിക്കുകയും ചെയ്യുന്നത് 'തറവാട് കാര്‍ണവര്‍' ആണ്.
ഭൂവുടമകള്‍ക്ക് വേണ്ടി കന്യാവനങ്ങള്‍ വെട്ടിത്തെളിച്ച് തണ്ണീര്‍ത്തടങ്ങളാക്കി മാറ്റി നെല്‍കൃഷിക്കായി പ്രയോജനപ്പെടുത്തുന്ന 'പുനംകൊത്തി'ല്‍ ഇവര്‍ വിദഗ്ധരായിരുന്നു. ഔഷധ സസ്യങ്ങള്‍, തടി ഇതര വന ഉല്‍പന്നങ്ങള്‍, മുള എന്നിവ ശേഖരിക്കുന്നതിലൂടെ നിരവധി പേര്‍ തൊഴില്‍ കണ്ടെത്തി. കൊട്ട നിര്‍മാണവും ഇവര്‍ക്കിടയില്‍ കാണപ്പെടുന്നു. ഇവരില്‍ ഭൂരിഭാഗവും കാര്‍ഷികത്തൊഴിലിനെ ആശ്രയിച്ചാണ് ജീവിക്കുന്നത്. ഇവരില്‍ ചിലര്‍ നാമമാത്ര കര്‍ഷകരാണ്. ഇവര്‍ കാര്‍ഷികേതര തൊഴിലാളികളിലേക്കും തിരിഞ്ഞിട്ടുണ്ട്.
മാവിലന്‍ സമുദായത്തിന്റെ സാംസ്‌കാരിക സ്വത്വവും രാഷ്ട്രീയ അവബോധവും വളര്‍ന്ന് സ്വയം ശാക്തീകരിക്കാനായി സംഘടനകള്‍ രൂപീകരിച്ചു. ആസൂത്രിതമായ വികസനത്തിലൂടെ കൊണ്ടുവരുന്ന നൂതനാശയങ്ങള്‍ സ്വീകരിക്കാന്‍ ഈ സമൂഹം തയ്യാറുമാണ്. കേരളത്തിലെ പട്ടികവര്‍ഗ വിഭാഗത്തില്‍ ഏറ്റവും വലിയ മൂന്നാമത്തെ സമുദായമാണ് മാവിലന്‍. ആകെയുള്ള 31166 ജനസംഖ്യയില്‍ 7736 കുടുംബങ്ങളാണുള്ളത്. ഇവരില്‍ 15229 പുരുഷന്മാരും 15937 സ്ത്രീകളും ഉള്‍പ്പെടുന്നു. കുടുംബത്തിന്റെ വലിപ്പം 4.02 ആണ്. ലിംഗാനുപാതം 1000 : 1049 ഉം ആണ്. മാവിലന്‍ ജനസംഖ്യ രണ്ട് ജില്ലകളിലായി തിരിച്ചിരിക്കുന്നു. 26554 കാസര്‍ഗോഡും (85.20%) 4612 കണ്ണൂരുമാണ് (14.80%).
മട്ടന്നൂരും കാഞ്ഞങ്ങാട്ടും ഉള്‍പ്പെടെയുള്ള മുനിസിപ്പാലിറ്റികള്‍, കണ്ണൂരിലെ 18 ഗ്രാമപഞ്ചായത്തുകള്‍, കാസര്‍കോടിലെ 16 ഗ്രാമപഞ്ചായത്തുകള്‍ എന്നിങ്ങനെ സംസ്ഥാനത്തെ 36 തദ്ദേശ സ്ഥാപനങ്ങളില്‍ മാവിലന്മാര്‍ സ്ഥിരതാമസമാക്കിയിട്ടുണ്ട്. മടിക്കൈ, പുല്ലൂര്‍ പെരിയ, കുറ്റിക്കോല്‍, ബേഡഡുക്ക, ബളാല്‍, കള്ളാര്‍, കോടോംബേളൂര്‍, പനത്തടി, വെസ്റ്റ് എളേരി, കിനാനൂര്‍-കരിന്തളം (എല്ലാം കാസര്‍ഗോഡ് ജില്ലയില്‍) എന്നീ ഗ്രാമപഞ്ചായത്തുകളിലാണ് മാവിലന്‍ സമുദായത്തിന്റെ ഗണ്യമായ ജനസംഖ്യയുള്ളത്.
അവസാനമായി അപ്ഡേറ്റ് ചെയ്തത് : 11-04-2024
ലേഖനം നമ്പർ: 1376